پی ایس ایل8 کیلئے الیکس ہیلزسمیت4ٹاپ انگلش کرکٹرز نے انگلش ٹیم چھوڑدی

جارح مزاج انگلش اوپننگ بلے باز الیکس ہیلز نے پی ایس ایل کا آنے والا سیزن کھیلنے کیلئے انگلینڈ ٹیم کے ساتھ دورۂ بنگلہ دیش پر جانے سے معذرت کرلی ہے۔

ایک انگلش جریدے ٹیلی گراف کے مطابق الیکس ہیلز دورۂ بنگلہ دیش کیلئے انگلینڈکے اسکواڈکا حصہ نہیں ہوں گے کیونکہ وہ پی ایس ایل 2023کیلئے اسلام آبادیونائیٹڈ کی نمائندگی کرنا چاہتے ہیں۔

گوکہ الیکس ہیلز دورۂ بنگلہ دیش سے دستبردارہورہے ہیں مگر اس کے باوجود وہ 13فروری سے شروع ہونے والی پی ایس ایل میں 26فروری سے ہی اسلام آبادیونائیٹڈکو دستیاب ہوسکیں گے کیونکہ انٹرنیشنل ٹی ٹوئنٹی لیگ سے فارغ ہوجانے کے بعد وہ کچھ دن آرام کریں گے۔

اسلام آبادیونائیٹڈ نے پہلے ہی الیکس ہیلز کے متبادل پلیئر کے طورپر تیمل ملز کو منتخب کرلیاہے۔

رپورٹ کے مطابق مارچ میں شروع ہونے والے دورۂ بنگلہ دیش کیلئے انگلینڈنے رواں ہفتے اپنے اسکواڈکا اعلان کرنا ہے جو بنگلہ دیش میں تین ون ڈے اور اتنے ہی ٹی ٹوئنٹی میچز کی سیریز کھیلے گا۔

یہ سیریز اکتوبر 2021میں ٹی ٹوئنٹی ورلڈکپ سے قبل کھیلی جانی تھی لیکن بنگلہ دیش اور انگلینڈکے کرکٹ بورڈزنے متفقہ طورپر اسے ملتوی کیاتھا جسے اب دوبارہ ری- شیڈول کیاگیاتھا۔

بتایا جارہاہے کہ نہ صرف الیکس ہیلز بلکہ سام بلنگز، لیام ڈاسن اور جیمز وینس بھی پی ایس ایل کھیلنے کیلئے دورۂ بنگلہ دیش کھیلنے سے معذرت کرنے والے ہیں ۔اس بارے انہوں نے ابتدائی طورپر انگلش سلیکٹرزاورمنیجمنٹ سے بات کرلی ہے۔