لٹن داس نے پی ایس ایل کیلئے بڑی قربانی دیدی

بنگلہ دیش کے وکٹ کیپر بلے باز لٹن داس نے پی ایس ایل 10 کا پوراسیزن کھیلنے کیلئے بڑی قربانی دیدی ہے جنہوں نے زمبابوے کے خلاف دو ٹیسٹ میچز کی سیریز چھوڑدی ہے۔

 پورے پاکستان سپر لیگ (پی ایس ایل) کے  پورے دسویں سیزن کے لیے نو آبجیکشن سرٹیفکیٹ (این او سی) حاصل کرنے کے بعد وہ کراچی کنگز کو تمام میچز کیلئے دستیاب ہوں گے۔

ناہید رانا کا معاملہ مختلف

دوسری جانب، فاسٹ بولر ناہید رانا نے کہا کہ وہ زمبابوے کے خلاف پہلا ٹیسٹ کھیلنے کے بعد ہی پی ایس ایل میں شامل ہوں گے۔ واضح رہے کہ ناہید رانا کو پشاور زلمی نے پِک کیا تھا۔

ایک رپورٹ میں دعویٰ کیا گیاہے کہ ناہید رانا کو کام کے بوجھ کے انتظام کی وجہ سے جزوی این او سی دیا گیا تھا۔ مزید برآں، لیگ اسپنر رشاد حسین کو مکمل این او سی مل گیا ہے، کیونکہ وہ بنگلہ دیش کے ٹیسٹ اسکواڈ کا حصہ نہیں ہیں۔

کون سا بنگلہ دیش کرکٹر کس پی ایس ایل ٹیم میں؟

13 جنوری کو ہونے والے پی ایس ایل پلیئرز ڈرافٹ میں لٹن داس کو کراچی کنگز نے منتخب کیا تھا جبکہ رشاد حسین اور ناہید رانا کو بالترتیب لاہور قلندرز اور پشاور زلمی نے منتخب کیا تھا۔

اس سے قبل، نجم الحسین، جنہوں نے حال ہی میں آئی سی سی چیمپئنز ٹرافی میں بنگلہ دیش کی کپتانی کی تھی اور اپنے قائدانہ کردار کو برقرار رکھنے کے مضبوط دعویدار ہیں، نے مختلف لیگز میں شرکت کے لیے کھلاڑیوں کو این او سی دینے کی اہمیت پر زور دیا۔

قومی ذمہ داری اور فرنچائز کرکٹ بحث پھر بھڑک اُٹھی

ان کے بیان نے بنگلہ دیش کی کرکٹ برادری کے اندر قومی وابستگیوں بمقابلہ فرنچائز کرکٹ پر بحث کو پھر سے بھڑکا دیا ہے۔

ٹیسٹ سیریز اور پی ایس ایل کے درمیان شیڈول تنازع نے بحث کو مزید ہوا دی ہے۔ بنگلہ دیش اپریل کے دوسرے ہفتے میں ٹیسٹ سیریز کے لیے تیاریاں شروع کرنے والا ہے۔

زمبابوے کے خلاف دو میچوں کی ٹیسٹ سیریز 20 اپریل سے 2 مئی تک شیڈول ہے، جس سے دونوں مقابلوں میں شامل کھلاڑیوں کے لیے ممکنہ ٹکراؤ پیدا ہوگا۔

پی ایس ایل 10 کا آغاز

پی ایس ایل کے دسویں ایڈیشن کا آغاز جمعہ 11 اپریل کو راولپنڈی کرکٹ اسٹیڈیم میں دفاعی چیمپئن اسلام آباد یونائیٹڈ اور دو بار کی فاتح لاہور قلندرز کے درمیان افتتاحی میچ سے ہونے والا ہے۔

چھ ٹیموں کے ٹورنامنٹ میں چار مقامات پر 34 میچ کھیلے جائیں گے۔ لاہور کا قذافی سٹیڈیم 13 میچوں کی میزبانی کرے گا جن میں دو ایلیمینیٹر اور فائنل شامل ہیں۔

راولپنڈی کرکٹ اسٹیڈیم میں 11 میچ ہوں گے جن میں 13 مئی کو پہلا کوالیفائر بھی شامل ہے جب کہ کراچی کا نیشنل بینک اسٹیڈیم اور ملتان کرکٹ اسٹیڈیم پانچ پانچ میچوں کی میزبانی کرے گا۔

ٹورنامنٹ میں تین ڈبل ہیڈرز بھی ہوں گے، جن میں سے دو ہفتہ کو اور ایک یوم مزدور (1 مئی) کو شیڈول ہے۔