حارث رؤف اور نسیم شاہ کیلئے بڑی خوشخبری

پاکستان اور ویسٹ انڈیزکے درمیان سیریزکے آغازسے قبل پاکستان کرکٹ بورڈ اور ٹیم منیجمنٹ لاہورمیں قومی ٹیم کا ایک بڑا تربیتی کیمپ لگانے کا پلان بنارہی ہے جس میں پچاس کھلاڑی شریک ہوں گے جن میں نہ صرف انٹرنیشنل لیول پر بلکہ پی ایس ایل 2022اور حالیہ ڈومیسٹک میچز میں اچھی کارکردگی دکھانے والے پلیئرز کو بھی شامل کیاجائے گا۔

اس موقع پر جب پاکستان ٹیم ویسٹ انڈیزکے خلاف ہوم سیریزکی تیاریاں کررہی ہے،پاکستان کے کئی کھلاڑی انگلینڈمیں کائونٹی چیمپئن شپ کھیلنے میں مصروف ہیں اور اُن میں سے فاسٹ بولر نسیم شاہ اور حارث رئوف ان فٹ ہوکر میچز سے آئوٹ ہوچکے تھے لیکن اب اُن کے حوالے سے اچھی خبر سامنے آئی ہے۔

تازہ رپورٹ کے مطابق انگلش کاؤنٹی کرکٹ کے دوران زخمی ہونے والے حارث رؤف اور نسیم شاہ نے انجریز سے چھٹکارا حاصل کر لیاہے او ر اب دونوں پیسرز انگلش کاؤنٹی کرکٹ میں اگلے میچز کیلیے اپنی ٹیموں کو دستیاب ہوں گے۔

یارکشائر کی نمائندگی کرنے والے حارث رؤف سائیڈ انجری کا شکار ہوئے تھے جبکہ دوسری جانب گلوسٹر شائر کے اسکواڈ میں شامل پیسر کندھے کی انجری سے نجات پانے کے لیے کوشاں تھے۔

محمد عامر بھی ان فٹ

ہیمسٹرنگ کی وجہ سے گلوسٹر شائر کو محمد عامر چھٹے راؤنڈ میں دستیاب نہیں ہوں گے، مڈل سیکس کی نمائندگی کرنے والے شاہین شاہ آفریدی کو آرام دیا گیا ہے جبکہ محمد رضوان فیملی وجوہات کی بنا پر اس راؤنڈ میں سسکیس کو دستیاب نہیں ہو سکیں گے۔